أسامة كمال : لما كنا نسمع ان الناس كانت بتموت زمان من الانفلونزا كنا بنستغرب

افتتح الاعلامي أسامة كمال برنامجه , ساعة مع أسامة كمال والذي يعرضه عبر قناة اليويتيوب  الخاصة به  قائلا المقولة الشهيرة معظم النار من مستصغر الشرر بتنطبق النهاردة اكتر من أي وقت.. مافيش نار أكبر من وباء كورونا، نار بتاكل كل حاجة قدامها، وفي نفس الوقت مافيش شرر اصغر من فيروس العين مش شايفاه.

وأضاف  أسامة كمال  واحنا صغيرين لما كنا نسمع ان الناس كانت بتموت سنة 1918 من الانفلونزا كنا بنستغرب ازاي الانفلونزا تموت ناس كتير كدة، لحد ما شفنا بعينينا وعشنا رغم التقدم العلمي الكبير..

وقال كمال  النهاردة بقول حالة الاسترخاء اللي تخلي فيه مطالبات برفع حظر مدته 10 ساعات بس، يعني 14 ساعة نعمل ما بدالنا، والعودة للمساجد والكنايس وكلام كبير عن مناعة المصريين

وأشاركمال  إلى أن كلام مقتطع من سياقه على لسان د. عوض تاج الدين ان المصريين مناعتهم جامدة.. بص يا سيدي كلام مستشار الرئيس وبرضه كلام خبراء تانيين عن القارة الافريقية ان معظم تعدادها شباب فدة يقلل عدد الوفيات والاصابات الحرجة.. كلام صح

احنا أمة شابة فعلاً، بس انت عارف اكتر مني حال صحة الشباب عاملة ازاي اليومين دول بسبب حاجات كتير منها سوء التغذية، الفقير اللي مش لاقي عناصر التغذية في اكله والغني عشان الجانك فوود.. ماتنساش الشيشة اللي شبابنا ماسابهاش من ايده وماتنساش أمراض التقزم.

:مستطردا حديث طيب هفترض ان الشباب محصن من المرض وانهم الحمد لله بيخفوا بسرعة، طب والكبار اللي بيخالطوهم، أب وأم وجد وجدة واللي واقف بيصلي جمبهم؟

مش عايزين نقفل البلد أكيد، بس لازم ما نركلسش أوي لحد ما نضطر نقفلها، عشان اتطمنا فطمعنا، يا جماعة معظم النار من مستصغر الشرر.. وبلاش تفاؤل بزيادة ان الموضوع هيخلص كمان اسبوع وللا اتنين، ما اعتقدش..